බිත්තර මිලත් ඉහළ යන ලකුණු

උත්සව සමය ළංවෙමින් පැවතියදී වෙළඳපොලේ බිත්තර හිඟයක් මෙන්ම මිල වැඩි කිරීමේ සූදානමක් පවතින බව වාර්තා වෙනවා.

පාරිභෝගිකයන් චෝදනා කළේ සතොස අලෙවිසැල් ජාලයේ මෙන්ම සිල්ලර වෙළඳසැල්වලද බිත්තර මිලදී ගැනීමට නොමැති බවයි.

එමෙන්ම සමස්ත ලංකා බිත්තර වෙළඳ සංගමයේ සභාපති ඇන්ටන් අප්පුහාමි කියා සිටියේ ලබන සඳුදා සිට දේශීය බිත්තරයක මිල රුපියල් 65 දක්වා ඉහළ යා හැකි බවයි.

මේ වනවිට වෙළඳපොලේ බිත්තරයක මිල පවතින්නේ රුපියල් 60 ක අගයකයි.

මේ අතර රුපියල් 43 ක මිලකට සතොස අලෙවිසැල් ජාලය හරහා ලබාදුන් ආනයනික බිත්තර ද මේ වනවිට එම අලෙවිසැල්වල නොමැති බවට පාරිභෝගිකයන් චෝදනා කරනවා.

එමෙන්ම සිල්ලර වෙළඳසැල් තුළද බිත්තර හිඟයක් පවතින බවයි ඔවුන් කියා සිටියේ.

ඉන්දියාවෙන් මෙරටට ගෙන්වා රුපියල් 35 ක මුදලකට ලංකා සතොස හරහා පාරිභෝගිකයන්ට පසුගිය දිනවල බිත්තර අලෙවි කෙරුණත් පසුගිය මස 21 වනදා සිට එහි මිල රුපියල් 08 කින් ඉහල දැමුණා.